STUDENTI NË QENDËR
Parimi bazë i UMB është: "studenti në qendër". Ky parim udhëheqës buron nga filozofia e Universitetit "Marin Barleti" dhe synimi i tij për një përgatitje të dyfishtë të studentit: profesionale dhe qytetare.
Në veçanti, shkollimi i bazuar në parimin "Studenti në qendër", përmban:
Programe studimi të akredituara, cilësore e specifikisht të orientuara
Programe studimi cilësore e të orientuara për përgatitjen e studentit me aftësi e shprehi praktike, për aftësimin e tij për të konkurruar drejtpërdrejt në tregun shqiptar e ndërkombëtar të punës;
Programe studimi cilësore e të orientuara për përgatitjen e studentit si qytetar aktiv e i interesuar për çështjet publike;
Programe të diferencuara studimi e trajnimi të bazuara në studimin e detajuar të formimit parauniversitar të studentëve, në prirjet, talentin, interesat si dhe në mangësitë e formimit të mëparshëm;
Konceptimin e universitetit si shkollë demokracie
Larmi formash për gjithpërfshirjen e studentëve në çdo qelizë të jetës universitare;
Përfshirjen sa më të madhe të studentëve në vendimmarrjet, në nivel universitar, fakultetesh dhe departamentesh;
Një tërësi formash (si referendume studentore, votime etj.), për realizimin e demokracisë së drejtpërdrejtë studentore dhe përfshirjen e masës së studentëve në vendimmarrjen e drejtpërdrejtë;
Procedura sa më konkurruese, tërësisht demokratike e sa më shkencore (për shembull, përmes metodës sociometrike) për zgjedhje e liderëve të Unionit Studentor, të përfaqësuesve të studentëve në institucione të ndryshme brenda dhe jashtë universitetit, për zgjedhjen e organizatorëve të aktiviteteve studentore etj.;
Mundësi për organizime alternative të studentëve, veç organizimit të kushtëzuar nga Ligji i Arsimit të Lartë (neni 55 "Këshillat e Studentëve"), konkurrencë në organizimin studentor dhe përkrahje sa më të gjerë të nismave studentore nga personeli akademik dhe administrativ;
Një tërësi formash për kompaktësimin e komunitetit studentor, si pjesa më e rëndësishme e komunitetit barletas;
Vlerësimin e çdo grupi studentor dhe kursi si një njësi komunitare, ku çdonjëri është/konsiderohet anëtar me të drejta përgjegjësi e detyrime të barabarta.
