Universiteti "MARIN BARLETI"

Për t’u rregjistruar pranë Universitetit “Marin Barleti” në vitin akademik 2008 – 2009, në kurset verore 2008, në kurset e profilizuara dhe në minorët e ndryshëm, aplikohen tarifa dhe pagesa të veçanta të detyrueshme për të gjithë, sipas një plani të miratuar nga Bordi i Universitetit.

Tarifa e aplikimit në Universitetin “Marin Barleti” është 25 Euro. Pagesa bëhet pranë sekretarisë mësimore. Tarifat e studimit për vitin akademik 2008 – 2009 shpallen brenda muajit prill 2008. Tarifat mbeten të pandryshuara gjatë vitit akademik, por ato mund të ndryshojnë nga njëri vit në tjetrin. Të gjitha ndryshimet njoftohen nëpërmjet kësaj faqeje të internetit si dhe përmes mjeteve të tjera të informimit.

Studentëve më të mirë, bazuar në rezultatet e tyre akademike, u akordohen tarifa të reduktuara. Këta studentë mund të përfitojnë tarifa të reduktuara për sa kohë që arrijnë rezultate të larta. Studentët e vitit të parë që kanë përfituar tarifa të reduktuara, duhet t’i ruajnë rezultatet e larta gjatë gjithë vitit të parë, në mënyrë që të kenë mundësi të përfitojnë tarifa të reduktuara në vitin pasardhës. Pra, përfitimi i një burse në një vit të caktuar akademik, nuk është garanci për vazhdimin e saj në vitet e tjera.

Po ashtu, studentët mund të përfitojnë bursa për merita kulturore ose sportive. Këto bursa jepen në fillim të çdo viti dhe kanë kohëzgjatje njëvjeçare. Bursat mund të përsëriten edhe në vitet pasardhëse, nëse studenti përfaqësohet në mënyrë të suksesshme në aktivitete apo kampionate me karakter kombëtar.

Tarifa që paguan studenti mbulon vitin akademik, dmth. 2 semestra ose 60 kredite. Në rast se studenti dëshiron të ndjekë kurse të tjera, apo të marrë kredite suplementare, atëherë ai duhet të bëjë pagesat përkatëse.

Studenti nuk lejohet të hyjë në provim dhe as të kalojë në semestrin pasardhës dhe atij nuk mund t’i lëshohet çertifikatë akademike, nëse ai nuk ka shlyer detyrimet financiare sipas afateve të përcaktuara, ose ka detyrime të tjera kundrejt administratës së universitetit.

* në rast të pagesës së menjëhershme aplikohet një zbritje prej 5% nga tarifa totale.

Pagesa të vonuara

Kur një student nuk është në gjendje ta paguajë të gjithë shumën e caktuar në kohën e rregjistrimit, kancelari i universitetit mund të miratojë pagesën në dy këste, si më poshtë:

50% paguhet në kohën e rregjistrimit
pjesa tjetër paguhet deri në 26 nëntor, për pagesat e vonuara për semestrin e vjeshtës, dhe deri në 5 prill, për pagesat e shtyra për semestrin e pranverës.

Politika e pagesave të vonuara vlen vetëm për ata studentë që vijojnë studimet. Zakonisht, në semestrin e parë të regjistrimeve nuk lejohen pagesat e vonuara. Megjithatë, në rrethana të caktuara, pagesa e vonuar miratohet sipas rastit dhe për studentët e rinj me kusht që studenti të paguajë të paktën 50% të tarifës në kohën e rregjistrimit dhe 50% brenda tre muajve, duke filluar nga data e pagesës së këstit të parë.

Pagesa me këste

Kjo mënyrë pagese është mjaft e volitshme për ata persona (studentë dhe familjarë) të cilët nuk janë në gjendje ta paguajnë menjëherë ose me dy-tre tarifën e studimit. Në të tilla raste, pasi dikutohet me kancelarin, vendoset që pagesa të bëhet mujore për të gjithë vitin akademik. Një gjë e tillë bëhet vetëm pasi është vërtetuar pamundësia e pagesës ndryshe të tarifës.

Tarifat për ripranim

Raste skualifikimi: studentët të cilët janë skualifikuar dhe ripranuar, janë të detyruar që të paguajnë sipas tarifave ekzistuese në momentin e ripranimit.
Ripranim pas një semestër tërheqje: aplikohet tarifa në fuqi në momentin e tërheqjes.
Ripranim për studentë të cilët janë tërhequr për më shumë se një semestër: studentët paguajnë një tarifë që i përgjigjet vlerës mesatare midis tarifës në momentin e tërheqjes dhe tarifës në momentin e ripranimit.

Politika e rimbursimit

Nisur nga nevoja për të njohur se cilët prej studentëve të rinj do të ndjekin UMB-në, politika e rimbursimeve nuk aplikohet për studentët e rinj.

Një rimbursim i plotë për studentët që vijojnë studimet (ata që kanë mbaruar semestrin e parë) bëhet vetëm për ato kurse të cilat ndërpriten përpara mbylljes së rregjistrimeve.

Studentët që e ndërpresin një kurs pas mbylljes së rregjistrimeve nuk gëzojnë të drejtën për asnjë rimbursim për kursin e ndërprerë.

Studentët që tërhiqen nga kursi pas mbylljes së rregjistrimeve marrin rimbursim të pjesshëm, në përpjestim të zhdrejtë me numri e javëve që studenti ka ndjekur që nga fillimi i kursit. Rimbursimet bëhen sipas skemës së mëposhtëme:

java e parë: rimbursim i plotë
java e dytë; 80% e shumës së plotë
java e tretë; 60% e shumës së plotë
java e katërt; 40% e shumës së plotë
java e pestë; 20% e shumës së plotë
pas javës së pestë nuk bëhet asnjë rimbursim

Studentët që ndjekin kurset verore dhe që tërhiqen vetëm një ditë pas rregjistrimit, rimbursohen plotësisht. Studentët që tërhiqen më vonë rimbursohen sipas skemës së mëposhtëme:

deri në fund të javës së parë; 75% e shumës së plotë
deri në fund të javës së dytë; 50% e shumës së plotë
pas fundit të javës së dytë nuk bëhet asnjë rimbursim

Politika e rimbursimeve i referohet pagesave për kreditet e kurseve (leksione dhe seminare), dhe ndjekjes së kursit të gjuhës së huaj. Nuk janë të rimbursueshme tarifat që lidhen me aktivitetet dhe shërbimet studentore, tarifa e regjistrimit, pagesa për laboratorët dhe tarifat e veçanta.