Universiteti "MARIN BARLETI"

Mbledhja e datës 18 prill hapi diskutime për problematikën e lindur në lidhje me formimin master të nivelit I dhe të nivelit II. Universiteti „Marin Barleti“, duke qenë gjithnjë koherent dhe në përgjigje të kërkesave të studentëve të tij, ka filluar procedurat paraprake për miratim nga MASH-i të projekteve, që do të ofrohen për studentët e diplomuar në shkencat ekonomike, juridike dhe politike.

U mor vendim nga të pranishmit që në diplomën „bachelor“ të rishikohet edhe njëherë rigrupimi i lëndëve nga përgjegjësit e secilit departament, sipas standardeve që kërkon ministria dhe miratimi përfundimtar të jepet nga Bordi i UMB-së.

Në procedurën e përzgjedhjes së stafit drejtues të zbatohen kriteret e mbështetura në statutin e UMB-së, në mënyrë që të sigurohet një mbarëvajtje në drejtimin e universitetit.

Me kërkesë të investitorit u pranua që aktorët në drejtimin e universitetit të mblidhen në mbledhje operative çdo 2 javë për bashkërendimin sa më të efektshëm të „sipërmarrjes universitare“.

Mbledhja e datës 11 prill parashtroi çështjet dhe problemet e ngritura nga rektori në lidhje me diplomimin e studentëve.

U mor vendimi, që:
për studentët e vitit III që kanë siguruar kreditetet, të bëhen 2 sesione provimesh në verë, me qëllim që studentët të fitojnë kreditet e siguruara dhe të diplomohen më tej.

Në lidhje me ripërtëritjen e Bordit të UMB-së u vendos që:
Bordi të ketë formatin aktual prej 7 anëtarësh, ku kryetar sërisht rivendoset z. Meidani dhe anëtarët e tjerë janë: znj. Meksi, z. Omari, z. Fuga, z. Godo, z. Beja, z. Spaho. Në një fazë tjetër do të merret vendimi për ripërtëritjen e Bordit.

Mbledhja e ardhshme u vendos më 18 prill.

Mbledhja e datës 18 janar 2008 la vend për sqarime, diskutime dhe përfundime të nevojshme për ecurinë buxhetore të vitit akademik 2007-2008.
Qëllimi i prezantimit të projekt-buxhetit para bordit qe gërshetimi i analizave të marketingut me rekrutimin e studentëve që janë prioritete të stafit të kancelarit dhe planifikimi më i detajuar i aktiviteteve që do të zhvillohen në vitin në vazhdim, të programuara nga stafi akademik. Projekt-buxheti u miratua në parim nga bordi dhe u kërkua të detajohet dhe të bëhen investime në infrastrukturën mësimore.

Në mbledhjen e parë të vitit 2008, dt. 07.01.08, u diskutuan dhe u miratuan detyrat dhe përgjegjësitë e prorektorit, si përgjegjës për aspektin akademik të universitetit dhe kancelarit, si përgjegjës për aspektin administrativ të universitetit.

Ndryshimet përkatëse në nene dhe modifikimet e statutit do t’i gjeni këtu:

Mbledhjet e vitit 2007

Mbledhja e VII (14.12.2007)

Në mbledhjen e fundvitit, ku të ftuar ishin pjesëtarë të stafit akademik dhe administrativ, u rezervua një vend i veçantë për ecurinë e procesit mësimor dhe edukativ në universitet.
Pas paraqitjes së raportit të rektorit drejtuar bordit të universitetit u kalua në pyetje, komente dhe diskutime, ku sqarimet e nevojshme u bënë nga rektori dhe përgjegjësit e departamenteve.

U pa e nevojshme dhe u vendos, që:

përzgjedhja e stafit të jashtëm akademik të bëhet objekt i mbledhjes së ardhshme të senatit,
të bëhet pajisja dhe pasurimi i bibliotekës me literaturën bazë të nevojshme për degët e universitetit.
U miratuan përgjegjësitë dhe detyrat për kancelarin e universitetit dhe u la që, në mbledhjen e ardhshme, të rishikohet drafti për pozicionin e prorektorit.

Mbledhja VI (16.10.2007)

Në mbledhjen e datës 16 tetor 2007 u analizua ecuria e regjistrimeve dhe transferimeve të studentëve për vitin akademik 2007-2008, duke u mbështetur në raportet e përpiluara nga sektori i marketingut.
Në bazë të pikave të forta dhe të dobëta të marketingut të evidentuara në raport u rrahën mendime dhe u dhanë sugjerime nga anëtarët e pranishëm të bordit për planin e ardhshëm të marketingut.

Një tjetër çështje e trajtuar ishte dhe forma e re që do të marrë universiteti, duke u përqendruar në 3 shtylla kryesore, që janë:

shkencat ekonomike, juridike dhe ato politike,

si dhe fillimi i përgatitjes së kurrikullave të masterit në UMB.

Mbledhja e ardhshme do të trajtojë më gjerësisht propozimet e grupit të aksionarëve për qeverisjen e universitetit.

Mbledhja V (22.06.2007)

Në mbledhjen e datës 22 qershor u dhanë sugjerime nga anëtarët e bordit në lidhje me programet mësimore të paraqitura nga përgjegjësit e departamenteve. Kështu, lënda “të drejtat e njeriut” u mendua të shndërrohej në lëndë me detyrim te diploma politolog dhe po kjo lëndë, të zëvendësohej me “të drejtat e minoriteteve” në minorin marrëdhënie ndërkombëtare.

U vendos që në parim të miratohen programet mësimore dhe të rishikohen edhe një herë programet mësimore të politologjisë dhe sociologjisë.

Z. Godo theksoi se universiteti duhet t’i kushtojë vëmendje mbrojtjes dhe pastrimit të gjuhës shqipe, duke vënë si kusht paraprak përdorimin e një gjuhe shqipe të folur në nivel universitarësh.

U vendos që lektoriumi të detajohej në plan-program.

Në lidhje me çështjen e dytë u pranuan modifikimet e neneve 50, 52, 54 të Statutit që flasin për zgjerimin e përgjegjësive të përgjegjësit të Departamentit të Mësimdhënies dhe Këshillimit.

Nga mbledhja e bordit u theksua si domosdoshmëri që, nga fillimi i shtatorit të vendoset një kancelar akademik, që të kryejë një kombinim detyrash që lidhen me procedurat mësimore dhe kancelarinë e universitetit, si dhe të komunikojë me prindërit dhe studentët për ecurinë akademike të këtyre të fundit.

Mbledhja IV (20.04.2007)

Në mbledhjen e datës 20 prill u diskutua për organizimin dhe drejtimin e universitetit. Në materialet e ardhura nga investitori u paraqitën idetë e funksionimit të universitetit nëpërmjet një njësie të re akademike, siç është provosti, përgjegjës akademik i mirëfunksionimit të universitetit.

Në materialet e përcjella u vërejtën me kujdes pikat e dobëta dhe pikat e forta të universitetit dhe u diskutua që, në fushatën e ardhshme të përthithjes së studentëve të shkohet me ndryshime.

Ideja e rektorit për krijimin e këshillave akademikë brenda departamenteve gjeti mbështetje mes anëtarëve të bordit.

Në këtë mbledhje u caktua që 3 zotërinj të bordit të përfaqësojnë "zërin" e tij në senatin e universitetit dhe të kenë fuqi vote, por jo të ngarkohen me detyra ekzekutive.

Mbledhja III (30.03.2007)

Mbledhja e datës 30 mars filloi me diskutimin e raportit, që rektori në emër të Senatit kishte përgatitur për këtë mbledhje, në lidhje me ecurinë e procesit mësimor dhe edukativ në universitetin "Marin Barleti".

Në këtë mbledhje, ku të ftuar ishin edhe përgjegjësit e departamenteve përkatëse të UMB-së, të cilët sqaruan pyetjet e lindura nga anëtarët e Bordit dhe ku, gjithsecili prej tyre sqaroi qëndrimin e vet për raportin, u rrahën çështje, që përbëjnë me të vërtetë shqetësim në mbarëvajtjen mësimore dhe edukative të universitetit tonë dhe u dhanë udhëzime për organizimin edhe më të mirë të punës dhe të fushatës promovuese.

Mbledhja II (02.03.2007)

Mbledhja e datës 2 mars 2007 rezervoi një vend të veçantë për planet e zhvillimit të biznesit dhe të pranishmit diskutuan rrugët që do të ndjekë universiteti "Marin Barleti" për të synuar profilin e një universiteti serioz, duke vendosur dhe standardet e cilësisë të një universiteti bashkëkohor.

Në mbështetje të kësaj, në mbledhje u dhanë orientime për të mundësuar binjakëzimin me një universitet të huaj të ngjashëm me profilin që ka UMB-ja.

Në mbledhje u miratua në parim dhe buxheti për vitin akademik 2006-2007. U la megjithatë detyrë, që të detajohen më shumë disa nga zërat e rëndësishëm të buxhetit që lidhen me të gjitha veprimtaritë e universitetit. Ky detajim do të rikonsiderohet në mbledhjen e ardhshme.

Mbledhja I (02.02.2007)

Më 2 shkurt 2007 u mbajt mbledhja e parë për vitin 2007. Në këtë mbledhje ishin ftuar përgjegjësit e departamenteve, për të paraqitur dhe mbrojtur para Bordit planet e zhvillimit të secilit departament. Përgjithësisht, Bordi mbajti një qëndrim kritik lidhur me propozimet e paraqitura nga departamentet.

Në përfundim të mbledhjes

(1) u vendos që të ketë një person të kualifikuar që do të merret me drejtimin, organizimin dhe pasurimin e bibliotekës, gjithmonë duke iu referuar kërkesave dhe nevojave të studentëve për shfrytëzim literature bashkëkohore dhe thellim dijesh;

(2) u vendos që deri në fund të vitit të organizohen 3-4 lektoriume, të cilat do të propozohen nga departamentet e UMB-së, ndërsa Senati do të bëjë përzgjedhjen dhe renditjen në kohë për zhvillimin e tyre;

(3) u miratua në parim krijimi i Qendrës së Shkencave Humane pranë UMB-së, që do të ketë logon e vet dhe do të funksionojë në varësi të projekteve.

Mbledhjet e vitit 2006

Mbledhja IX

Mbledhja e fundit për vitin 2006 iu kushtua diskutimit të formimeve plotësuese (minorëve), që i bashkëngjiten formimit bazë të studentit.

Mendimi mbizotërues i të pranishmëve ishte që minori të ndërtohet në mënyrë të tillë, që të mos përsërisë lëndë apo module nga formimi bazë, me qëllim që të mos ketë mbivendosje të lëndëve, por të ketë plotësim ose pasurim të diplomës bachelor.

U morën në shqyrtim edhe një herë lëndët e secilit minor të ofruar në UMB; u modifikuan disa lëndë të minoreve dhe u ndryshuan ngarkesat javore të disave prej tyre.

Mbledhja VIII (13.10.2006)

Në mbledhjen e datës 13 tetor 2006 u rrahën mendimet për strategjinë që do të zhvillojë universiteti në lidhje me pranimin dhe përthithjen e studentëve. U theksua dhe u këmbëngul në idenë që marketingu më i mirë i universitetit "Marin Barleti" është, sikundër u theksua nga kryetari i Bordit, Prof. Rexhep Meidani, "mbajtja ose ruajtja e profilit të një universiteti serioz".

Në këtë mbledhje u vendos të krijohet një grup me përfaqësues të universitetit, të cilët në marrëdhëniet me publikun do të realizojnë prezantimin në publik të imazhit dhe të përparësive që universiteti "Marin Barleti" ofron për të rinjtë.

Mbledhja VII (21.08.2006)

Mbledhja e datës 21 gusht 2006 iu kushtua diskutimit dhe miratimit të planeve mësimore të degëve. Në këtë mbledhje Prof. Artan Fuga parashtroi pikëpamjet e tij në lidhje me blloqet e lëndëve që do të duhet të përfshiheshin patjetër në planet mësimore.

Ideja e bllokut të lëndës qëndron në unifikimin e 4-5 lëndëve të shpërndara në kurrikulat që ofron universiteti për të gjitha degët, për të mundësuar krijimin e një baze kulturore dhe qytetare për specialistët e ardhshëm dhe për të unifikuar formimin e përgjithshëm të studentëve të UMB-së. U vendos që plan-programet të pranohen dhe mendimet e Prof. A. Fuga të merren në konsideratë.

Mbledhja VI (03.08.2006)

Në mbledhjen e datës 3 gusht 2006 u diskutua për rregulloren e UMB-së dhe ndryshimet që do të pësonte ajo. Në rregullore u vendos që të përdorej koncepti i krediteve për kalimin e studentëve nga viti i mëparshëm në vitin pasardhës dhe jo koncepti i kalimit në vitin tjetër nëpërmjet shlyerjes së shumicës së lëndëve. Kjo bëhet për të lehtësuar transferimin dhe mobilitetin e studentëve.

Rregullorja e universitetit e miratuar tashmë edhe nga Bordi mund të gjendet këtu.

Mbledhja V (19.06.2006)

Në mbledhjen e datës 19 qershor 2006 u miratua dhe u nënshkrua nga të gjithë anëtarët e Bordit statuti i universitetit "Marin Barleti", i cili i hap udhën mbarëvajtjes së elementeve bazë të një universiteti modern. Statuti i universitetit mund të gjendet këtu.

Çështja e dytë e rendit të ditës kishte të bënte me shqyrtimin dhe miratimin e kandidaturave të paraqitura për të drejtuar departamentet. Në përfundim Bordi vendosi që për drejtimin e departamentit të menaxhim-biznesit, atij të drejtësisë dhe departamentit të shkencave politike dhe sociale të komandojnë tre kandidaturat që plotësonin më mirë kriteret e vendosura më parë për secilin nga këto departamente.

Çështje tjetër me rëndësi e trajtuar në këtë mbledhje ishte edhe krijimi i komisionit që do të merret me ndjekjen dhe mbështetjen e veprimtarive që lidhen me marketingun, promovimin e universitetit dhe marrëdhëniet me publikun: në përbërje të këtij komisioni u caktuan të jenë edhe Prof. Dr. Nikolla Dhamo e Prof. Dr. Luan Omari.

Në përfundim të mbledhjes u diskutua për mënyrën e organizimit të takimit të datës 27 qershor me temë: "Mirëqeverisja në universitetet jopublike - kusht për sigurimin e cilësisë", ku edhe do të bëhet e njohur në publik krijimi dhe përbërja e Bordit të universitetit.

Mbledhja IV (27.05.2006)

Në këtë mbledhje ku morrën pjesë të gjithë anëtarët e bordit, dhe që u kryesua nga kryetari i bordit, u shqyrtua në parim statuti i Universitetit “Marin Barleti” dhe më pas u diskutuan ai nen për nen.

Në përfundim të mbledhjes u miratua në unanimitet statuti i Universitetit “Marin Barleti”, në të cilin përcaktohen qartë qëllimi i universitetit, degët dhe diplomat, të drejtat dhe detyrimet e universitetit, struktura qeverisëse e universitetit, dhe organet drejtuese të universitetit.

Mbledhja III (12.05.2006)

Në këtë mbledhje u diskutua për funksionet e bordit dhe nëse ai do të ketë natyrë këshilluese apo vendimarrëse. Pas shumë mendimeve nga ana e anëtarëve të bordit dhe përfaqësuesve të investitorëve u ra dakord që bordi të ketë natyrë këshilluese dhe në raste të vecanta (të përcaktuara qartë) të ushtrojë vendimarrje.

U vendos gjithashtu që bordi të ketë në përbërjen e tij 7-10 anëtarë dhe mbledhjet të zhvillohen normalisht një herë në muaj, dhe dy mbledhje të mëdha të zhvillohen dy herë në vit, në fillim dhe në fund të vitit akademik.

Mbledhja II (28.04.2006)

Në këtë mbledhje anëtarët e bordit dhe përfaqësuesit e investitorëve zgjodhën në unanimitet kryetarin e bordit, Z. Rexhep Mejdani.

Z. Mejdani u vlerësua dhe u përzgjodh për kontributet e tij në fushën akademike, për eksperiencën e gjatë në mësimdhënie, për përvojën menaxhuese të institucioneve universitare dhe shkencore.

Mbledhja I (21.04.2006)

Mbledhja e parë u hap nga përfaqësuesi i investitorëve, z. Dudaj dhe kryesisht u diskutua për bordin, përbërjen dhe funksionin e tij, kandidaturat e reja për anëtar bordi.

Në këtë mbledhje u vendos që anëtarë të bordit të jenë:

Z. Rexhep Mejdani
Z. Sabri Godo
Zj. Ermelinda Meksi
Z. Edmond Spaho
Z. Fatos Beja
Z. Luan Omari
Z. Artan Fuga